Eldri skýrslur - RNU Skýrslur gefnar út af Rannsóknarnefnd umferðarslysa (RNU) Síða 7

Nýlegar slysa- og atvikaskýrslur:

Krýsuvíkurvegur við Bláfjallaafleggjara

Ökumaður bifhjóls ók suðaustur Krýsuvíkurveg á miklum hraða. Skammt frá Bláfjallaafleggjara ók hann framúr tveimur malarflutningabifreiðum. Vegsýn framundan var takmörkuð vegna hæðar og beygju og fór ökumaðurinn yfir heila línu og á vegarhelming fyrir umferð úr gagnstæðri átt. Við framúraksturinn missti hann stjórn á hjólinu, náði ekki beygjunni og hafnaði útaf vinstra megin. Á veginum voru 130 metra skriðför eftir bifhjólið en það hafnaði á hraunvegg 30 metra utanvegar. Vitni greinir frá því að við framúraksturinn hafi afturendi bifhjólsins byrjað að rása og ökumaður misst stjórn á því.

Skýrsla 15.10.2007
Umferðarsvið

Vestfjarðavegur við Klukkufell

Ökumaður Opel fólksbifreiðar ók norður Vestfjarðaveg seinnipart dags. Veður var bjart og vindur var lítill. Vegyfirborðið var blautt og gekk á með rigningu á köflum. Þar sem slysið átti sér stað liggur vegurinn yfir hæð og í mjúkri beygju. Vegsýn fram á veginn er takmörkuð og var Opel bifreiðinni ekið niður brekku þegar hún fór útaf veginum.

Skýrsla 17.09.2007
Umferðarsvið

Suðurlandsvegur við Kirkjuferju

Ökumaður fólksbifreiðar ók austur Suðurlandsveg í átt að Selfossi. Á Hellisheiði höfðu vegfarendur tekið eftir einkennilegu aksturslagi hans þar sem hann hafði farið yfir á öfugan vegarhelming svo lá við slysi. Nokkru síðar, þegar ökumaður var kominn að afleggjaranum við Kirkjuferju ók hann aftur yfir á öfugan vegarhelming og hafnaði framan á vörubifreið sem ekið var vestur Suðurlandsveg (sjá mynd). Var árekstrarstaður á nyrðri akreininni, á vegarhelmingi vörubifreiðarinnar. Áreksturinn var mjög harður og fórst ökumaður fólksbifreiðarinnar samstundis.

Skýrsla 11.09.2007
Umferðarsvið

Bessastaðabrekka

Hópbifreið var á leið frá Kárahnjúkum að Egilsstöðum með 38 manns innanborðs. Slysið varð ofarlega í Bessastaðabrekku þar sem hópbifreiðin fór útaf. Vegurinn um Bessastaðabrekku liggur í kröppum beygjum og er 10% halli á honum. Þegar ekið er niður brekkuna er fyrst 1.7 km langur aflíðandi kafli þar sem vegurinn liggur í sveig áður en komið er að krappri hægri beygju. Þar fór bíllinn útaf.

Skýrsla 26.08.2007
Umferðarsvið

Þorlákshafnarvegur

Toyota fólksbifreið var ekið afar ógætilega út úr Hveragerði og suður Þorlákshafnarveg í björtu og þurru veðri. Að sögn vitna var hún á mikilli ferð og nokkrum sinnum nærri því að lenda í árekstri við önnur ökutæki. Rétt sunnan afleggjarans að Grímslæk missti ökumaðurinn stjórn á bifreiðinni um það leiti sem hún mætti annarri bifreið sem ekið var norður sama veg. Bifreiðin skreið til hliðar út af veginum og lenti útaf vinstra megin miðað við sína akstursstefnu. Bifreiðin valt nokkrar veltur, kastaðist yfir girðingu og endaði á toppnum.

Skýrsla 13.08.2007
Umferðarsvið

Laugarvatnsvegur við Þóroddsstaði

Ökumaður ók austur Biskupstungnabraut. Við Minni-Borg mættu lögreglumenn ökumanni og gáfu honum merki um að stöðva bifreiðina til að athuga ástand hans, en hann virti það að vettugi og jók þess í stað hraðann, sem áður hafði verið innan eðlilegra marka. Lögreglan hóf þá eftirför. Sáu lögreglumenn bifreiðina tvisvar eftir að þeir hófu eftirförina, fyrst á hæð áður en beygt er inn á Laugarvatnsveg af Biskupstungnabraut, en síðan sáu þeir rykmökk í fjarska þegar þeir komu inn á Laugarvatnsveg. Voru þeir þá að svipast um eftir bifreiðinni en hættir eftirför. Við nánari eftirgrennslan kom í ljós að rykmökkurinn var eftir bifreiðina og hafði ökumaður ekið útaf. Á vettvangi mátti sjá að ökumaður hafði ekið mjög hratt í beygju skammt sunnan við bæinn Þóroddsstaði og farið útaf vinstra megin.

Skýrsla 06.08.2007
Umferðarsvið

Biskupstungnabraut við Minni-Borg

Ökumaður fólksbifreiðar ók austur Biskupstungnabraut og stöðvaði við innkeyrsluna að versluninni Minni-Borg. Hugðist ökumaður beygja til vinstri inn á planið sem er fyrir framan verslunina. Þremur bifhjólum var ekið vestur Biskupstungnabraut á sama tíma. Ökumaður fólksbifreiðarinnar sá ekki bifhjólamennina og ók í veg fyrir þann sem fremstur fór. Bifhjólamaðurinn náði ekki að beygja frá og hafnaði á aftanverðri hægri hlið bifreiðarinnar. Við áreksturinn féll hann af hjólinu og kastaðist yfir bifreiðina. Hann hlaut innvortis áverka sem drógu hann til dauða. Hann notaði viðurkenndan öryggisbúnað, var með hjálm og í bifhjólagalla. Ökumaður og farþegi í fólksbílnum hlutu minniháttar áverka.

Skýrsla 28.07.2007
Umferðarsvið

Akrafjallsvegur við Innnesveg

Árekstur varð á Akrafjallsvegi við vegamót Innnesvegar. Ökumaður strætisvagns ók vestur Akrafjallsveg að vegamótunum og hugðist beygja til vinstri inn á Innnesveg. Á sama tíma var þremur bifhjólum ekið austur Akrafjallsveg áleiðis framhjá vegamótunum á 80-90 km/klst. hraða. Ökumaður strætisvagnsins ók í veg fyrir bifhjólamennina með þeim afleiðingum að sá sem var fremstur lenti í árekstri við vagninn og fórst við það.

Skýrsla 16.07.2007
Umferðarsvið

Þjóðvegur 1 í Norðurárdal í Skagafirði

Seint á aðfararnótt sunnudagsins 9. júlí fór jeppabifreið út af þjóðvegi eitt efst í Norðurárdal í Skagafirði með þeim afleiðingum að ökumaður bifreiðarinnar lést. Ökumaðurinn var karlmaður á þrítugsaldri og var hann einn í bílnum. Ekki liggur fyrir nákvæm tímasetning á slysinu, en það mun hafa gerst milli klukkan 4:30 og 6 að morgni.

Skýrsla 09.07.2007
Umferðarsvið

Suðurlandsvegur við Mæri

Banaslys varð skammt vestan við bæinn Mæri á þjóðvegi 1 milli Hveragerðis og Selfoss.

Skýrsla 21.03.2007
Umferðarsvið